A alternativa que te defende

Posts Tagged ‘moaña’

O Partido Papular de Moaña ven de poñer a andar unha campaña en contra da legalidade urbanística no concello de Moaña, coa difusión de pasquíns que pretenden denunciar as actuacións da Concellería de Urbanismo en materia de inspección e sanción de infraccións urbánisticas. Según o presidente do PP local, estase a producir demasiado control sobre a actividade urbanística en Moaña, e sobre todo, estase sendo demasiado estricto na aplicación da legalidade, e según afirma «O goberno BNG-PSOE foi o primeiro en aplicar sancións coercitivas en Moaña» ¿quere decir que durante o goberno do PP non se produciu ningún tipo de sanción? ¿a caso non se cometeron irregularidades urbanísticas? Preguntámonos cal é a súa proposta en materia de urbanismo cara as vindeiras eleccións, ¿aplicarán a política do «todo vale» e se pode negociar?
Por último, fan un chamamento a todas aquelas persoas expedientadas ou sancionadas para que se acheguen a súa oficina de asesoramento para protestar.
Dende o BNG queremos aclarar os seguintes aspectos:
1º-A sanción ou multa coercitiva prodúcese cando a infracción non é subsanada en tempo e forma indicada no expediente de infracción. É decir, que se non se procede a reposición da legalidade é cando se emite a sanción.
2º-Os expedientes sancionadores non son «caprichos» do delegado de Urbanismo, senón que parten dos informes técnicos do persoal do Dpto. de Urbanismo, e sempre están fundamentados na LOUGA (Lei aprobada polo PP, Lei 9/2002, de 30 de decembro, de Ordenación Urbanística e Protección do Medio Rural de Galicia.), e sobre a obxectividade destes informes non caben «negociacións».
3º- A aplicación da normativa urbanística debe ser respectada por todos e todas os/as veciños/as, e para que isto sexa así , os técnicos do departamento de urbanismo deben poder traballar de xeito obxectivo e sen coaccións políticas de ningún tipo. ¿Que opinan de que un Concelleiro, Deputado Autonómico, e candidato a alcaldía dentro duns meses, cuestione o seu traballo?
O PP está acostumado a «negociar» sobre cuestións legais, pero en materia de Urbanismo os informes técnicos marcan se algo é legal ou non o é, e non hai termos medios. O BNG manterase sempre dentro do marco da legalidade.
José Fervenza anima a todas estas persoas, que non aceptaron as reposicións da legalidade a «denunciar» ¿a quen? ¿a que?¿o que?, non se sabe ben que pretenden decir, e outra das «ocorrencias» as que nos ten acostumado o PP nos últimos tempos con fins de enlamar a vida municipal.
É escandaloso que ocorran estes feitos, e que o PP actúe de xeito contrario a lei, Fervenza debe ser o primeiro político do País que pide públicamente que non se respete a legalidade urbanística dun concello, todo un exemplo de quen non debe chegar nunca a gobernar o noso concello.

O BNG de Moaña ven de  facer unha moción que foi aprobada no pasado pleno do día 28 de Decembro  na que se expoñen ós e ás veciños e veciñas de Moaña as causas que fan imposible o apoio do Grupo Municipal  do BNG ó anteproxecto de Área Metropolitana que o Partido Popular pretende levar a cabo.
Entre os motivos fundamentais podemos nomear;
1º.-  A Xunta de Galicia ven de anunciar a presentación do Anteproxecto de Lei de creación da Área Metropolitana de Vigo que ten  por obxecto e natureza a creación da área metropolitana de Vigo e o regulamento da súa organización, competencias e financiamento.

2º.- É o resultado dun proceso no que non houbo concertación nen consenso xa que na elaboración de dito anteproxecto non tiveron unha participación efectiva e real os concellos afectados, limitándose o Goberno galego ao establecemento de contactos mediante persoal técnico, pero sen nengún encontro de traballo no plano político, limitándose a posterior a un convite de alcaldes e alcaldesas e outras personalidades para facer unha presentación mediática e sen convidar ao conxunto das corporacións locais.

3º.- Examinado o contido de dito anteproxecto, desprendese que é unha proposta que non responde ás necesidades de vertebración dun espazo xeográfico funcional de feito en base as seguintes cuestións:
a)    Non obedece a unha reforma da estrutura institucional local galega, no camiño da racionalidade e austeridade no gasto público e dirixida a configurar un novo mapa institucional local que adecúe os entes locais á nosa realidade e permita superar a actual delimitación provincial e ás propias Deputacións provinciais.
b)    Non é a formulación mais acaída nin desde a perspectiva da súa función política, nin da súa racionalidade e eficacia administrativa, nin tampouco da súa adecuación á realidade territorial na que pretende asentarse.
c)    A súa implantación representa unha duplicación do entramado institucional fronte a racionalidade das distintas estructuras da administración existentes.
d)    Representa un incremento na carga impositiva á cidadanía que reside no ámbeto xeográfico que abarca.
e)    Non define o necesario traspaso á Área das funcións e atribucións que ten a Deputación provincial.
f)    Non contempla a necesaria autonomía financeira medianta as achegas económicas precisas por parte da administración autonómica nen da Deputación provincial.
g)    Non define dun xeito claro e conciso as competencias que pode desenvolver supeditándoas a un proceso de desenvolvemento futuro.

Por todo isto, o que o BNG solicita é:
1)    Impulsar a reforma da lexislación básica en materia de réxime local, de xeito que resida no Parlamento Galego a capacidade plena sobre o deseño institucional e administrativo das entidades locais de Galiza

2)    Impulsar a instauración progresiva dun novo esquema institucional local que que supoña unha redución das estruturas burocráticas, que conterá os seguintes fitos:
a.    Redución das atribucións e funcións das Deputacións Provinciais, mantendo –entanto non se aborde a necesaria reforma constitucional- exclusivamente as relacionadas coa asistencia a municipios.
b.    Traspaso das funcións e servizos das corporacións provinciais á Administración galega e aos concellos.
c.    Institucionalización definitiva das comarcas e áreas metropolitanas como entes territoriais supramunicipais asumindo a xestión comarcal das competencias das Deputacións Provinciais.
3)    Retomar os traballos desenvoltos ata o de agora para a creación da Área Metropolitana de Vigo mediante a participación de todos os concellos implicados na proposta inicial, e garantindo un proceso de concertación e consenso para acadar a proposta mais acaída para esta área xeográfica.

E isto ¿por que?, pois por custións tan sinxelas como que non resolvería ningunha das eivas que padecemos no noso Concello, podendose dar o paradoxo de que as institucións con competencias actualmente en materias como  Transporte, Xestión da Auga, Mantemento de Estradas… poidesen descargar as competencias sobre a Futura Área Metropolitana sen dotala de maior financiación e medios, o cal repercutiría directamente na calidade do servizo e nun aumento da carga impositiva sobre os veciños e veciñas. E en temas tan importantes para Moaña, como pode ser o trasnporte Metropolitano, nin sequera se podería integrar este modelo por seguir en vigor concesións e rutas que declaran as súas cabeceiras fora do ámbito metropolítano.
O BNG quere unha Área Metropolitana útil e eficaz, para o cal é preciso o diálogo e o consenso entre todas as administracións implicadas de igual a igual, e non asoballando e impoñendo do xeito ó que nos ten xa acostumados o Partido Popular.
Podemos falar, pero non tragar calquera cousa que nos queiran impoñer cun claro afan electoralista. Somos responsables do presente, pero tamén do noso futuro, e dende logo, pediránse responsabilidades no caso de que este anteproxecto sexa aprobado  empregando o «rodillo» do PP.

A loita pola mellora sanitaria en Moaña tomou pulo ala polo 1999 da man do BNG. Unha loita con obxectivos concretos: unha piscina municipal, un centro de saúde e, con carácter inmediato, dotar a Casa do Mar duns servizos mínimos en tanto aquel non sexa realidade.

A piscina municipal, os terreos para o centro de saúde, a ambulancia medicalizada, o ascensor  ou a supresión de barreiras arquitectónicas na Casa do Mar e, nos últimos tempos,  a dotación dun servizo de fisioterapia e odontoloxía cos seus orzamentos, asignación de persoal e posta a disposición do Sergas do local esixido  para empezar a funcionar xa. Todo este resultado é froito dun traballo constante e cheo de complicacións e dificultades.

O 4 de abril do 2009, no pleno extraordinario sobre sanidade houbo un acordo unánime de todos os grupos políticos, PP e PSOE,  con dous compromisos concretos :

- O Concello porá a disposición do Sergas un local para fisioterapia e odontoloxía.

- O Concello xestionará o uso sanitario dos locais da Casa do Mar.

Como dicíamos, dende aquela o Concello púxose a traballar na procura destes dous obxectivos.  Froito dese traballo empezouse a tramitar un proceso que deu como froito a consecución dos locais para fisioterapia e odontoloxía na rúa Don Donato.

A falla de poucos meses para a posta en marcha destes locais un novo anuncio semella retrasar todo de novo. O responsable do Sergas acaba de “suxerir” ao Concello de Moaña que deixe sen efecto a sinatura do contrato de alugamento dos locais da rúa Don Donato que ían acoller as consultas de Fisioterapia e Odontoloxía. As xestións do PP ante a Consellería abren “unha nova alternativa” cuxos trámites se poñen en marcha: a prestación destes servizos na Casa do Mar.

De principio, nada teríamos que obxectar: aforro de alugamentos, concentración de servizos, pero…

Porque esperaron tanto? Porque non empezaron os trámites fai un ano? Danse conta que isto pode supor, na práctica un retraso de mais dun ano para a posta en marcha destes dous novos servizos? Por aforrar cartos ó Concello de Moaña? Non. O Sr. Fervenza o que persegue é unha foto máis pensando no 2011, por puro oportunismo, contando con apuntarse un tanto fora de tempo, nun partido xa xogado duramente por outros e pondo en perigo un servizo tan necesario e demandado que pode estar funcionando en cuestión de poucos  meses.

Por tanto pregámoslle o Sr. Fervenza que, se quere facer un favor os moañeses e moañesas, cumpra cos acordos aos que se comprometeu fai un ano, co seu partido xa na Xunta; acordos, respaldados pola Plataforma da Sanidade, que entendía que o déficit asistencial abrangue tamén a cirurxía menor, as citoloxías, a matrona, ao pediatra, a instalación de aparatos de banda ancha sen instalar por falla de espazo, e que estes servizos poderían prestarse nas zoas INFRAUTILIZADAS da Casa do Mar, sen esquecer os fins de carácter social non sanitarios para os que foi creada esta instalación e que  tamén teñen un importante número de  usuarios.

O PSOE  de Victor Pastoriza  sufre o síndrome dos partidos que despois de ter nas súas mans a posibilidade de resolver estes problemas  durante  catro anos, e non o fixeron, agora non son que de ser valentes e apostar ó máximo para Moaña: dispoñer xa de todos os servizos sanitarios que nos merecemos onda sexa, ata que o Centro de saúde  poida ser unha realidade. Prefiren  xogar a nadar e gardar a roupa. Coma sempre.

OS DOUS PUNTOS do acordo plenario son  perfectamente compatibles entre si, e así se votaron, e non vale vir agora coa substitución dun por outro, non nos dean un polo prezo de dous. E non esquezan que o salón de actos e a biblioteca tamén son necesarios.

Por unha vez, sumen; non resten por puro interese electoral.