A estas altura, o BNG ten que felicitar publicamente ao Sr Fervenza por conseguir que por fin a súa irmán realizara a cesión da súa parcela, que con anterioridade xa realizaran a maioría dos veciños e veciñas.

É unha gran noticia, pero chámanos poderosamente a atención que o compromiso que adquiriu o alcalde no Pleno e con determinados colectivos veciñais, “de que ían a ceder todo o mundo por igual e non ía haber favoritismo”, non se están levando a cabo, dado que xa se pode comprobar sobre o terreo que a obra non se axusta ao proxecto inicial, que determinados “protexidos” salvan a súa parcela cargándolle aos de enfronte toda a cesión obrigatoria, ou que determinados “destacados membros excelsos do comité de campaña”, quedan atrás na cesión que tiñan comprometida ao darse conta de que a obriga e o compromiso non é igual para todos, de que existe favoritismo.

E non é que o diga o BNG, é que calquera veciño ou veciña pode comprobar sobre o terreo as marcas vermellas, pintadas pola empresa adxudicataria das obras, por onde debía ir o trazado e por onde vai realmente.

E moito nos tememos que este modelo de xestión traía consigo que algún tramo dos “protexidos”, non vai acadar o ancho que contempla o proxecto.

Queremos recoñecer o esforzo a todas aquelas persoas e institucións que colaboran e  fan posible o Correlingua cada ano e dar os nosos parabéns aos organizadores e aos colexios polo éxito, sabedores  do esforzo que supón, non só organizar un evento de tan alta participación, senón tamén financialo  neste momento no que a subvención aos centros educativos para actividades de fomento e dinamización da lingua galega  foi reducida en máis do 70%.

Mostramos o noso recoñecemento ás ANPAS, Comunidades de Montes e ás familias do alumnado pola súa implicación na defensa do noso idioma  e pola súa colaboración no financiamento para que os nenos e nenas do Morrazo  puidesen gozar deste día no noso concello.

Tamén queremos felicitar ao grupo Pesdelán, por poñer en valor a nosa cultura e o noso idioma, facéndoos chegar aos nenos e nenas a través da súa música e das súas danzas.

Só lamentamos  a falta de implicación económica por parte do goberno de Moaña no Correlingua, este ano que a organización apostou por traer a Festa da Lingua ao noso concello. Decidiron non asumir o custe da megafonía como o fixeron outros concellos e non entendemos que se negasen a pagar o transporte aos colexios de Moaña que o necesitaban para poder asistir ás actividades, como se fixo os anos anteriores cando o Correlingua tivo lugar noutros concellos dentro e fóra da comarca. Nesta ocasión o custe do transporte deberon asumilo na súa maior parte as familias o que fixo que houbese nenos e nenas que non puidesen participar deste acontecemento.

O motivo que alegou o goberno para non financiar estas actividades foi a falta de orzamento, co que xa empezamos a ver as consecuencias da denegación da subvención de normalización.

O señor Fervenza aínda non se decatou de que en Moaña,  a política do “piche”, xa quedou no século pasado. Na última década asfaltáronse os principais viais do concello, ancheáronse as estradas, fixéronse as beirarrúas, colocouse iluminación, bancos, xardineiras e sempre cumprindo  escrupulosamente as normas que marca o PXOM, e con dignidade, sen necesidade de acudir ao vasalaxe do Sr. Louzán.

Ante esta incapacidade por manter ou mellorar a herdanza que outros lle deixamos, está a desenvolver unha práctica “tercermundista”, de clientelismo político co “piche da Deputación” e poder ir facendo pequenas cacicadas, vencelladas directamente con afiliados ou simpatizantes desta formación política. A última, asfaltar o sendeiro, e o espazo protexido da carballeira de Bronlle.

Esta é a política urbanística sen ideas, sen respecto polo medio ambiente do Partido Popular, que non ten reparo en tirar co asfalto polos carreiros e as carballeiras, mentres ao outros camiños, como o do Caeiro se lles nega o ancheado. E o máis sangrante é que estas falcatruadas, este tirar cos cartos, as levan a cabo coa maquinaria e persoal da Deputación Provincial de Pontevedra, cos cartos de todos os contribuíntes, ao servizo partidista.

Un espazo emblemático, a carballeira de Bronlle, moi querida e respectado polos veciños, que estes “populares” agreden querendo convertelo nunha carballeira para coches. Un mal entendido progreso que José Fervenza e Ángel González utilizan, crendo que co piche se pode tapar toda a súa miopía política.

O BNG esíxelle a José Fervenza que pare esta agresión, que respecte o Plan Xeral, que sexa digno cos veciños de Meira e que protexa este  pequeno espazo de carballos, último reduto do que foi a Devesa Real, antiga carballeira do coto de Meira. Que levante a zahorra, retire a maquinaria da Deputación, e  que acondicione o carreiro tradicional como unha senda peonil.

Do contraro, poremos estes feitos en coñecemento da Consellería de Medio Ambiente para vergonza e escarnio da Deputación e do propio concello que utilizan os cartos públicos para agredir o noso patrimonio forestal.

O BNG, coincide có Sr. Fervenza en que esa é unha zona que creceu moito nos últimos anos en servizos e dotacións públicas. As corporacións anteriores, presididas polo Sr. Millán, que tiñan un modelo claro de desenvolvemento urbanístico ao servizo dos veciños e veciñas, levou a cabo a posta en funcionamento de diversas instalacións públicas como o centro de AFAMO, a piscina municipal, a Casa da Mocidade, e o centro de Odontoloxía e Fisioterapia. Gobernos que se dedicaron durante os últimos 8 anos a traballar calada e continuamente e  non a vender grandes aparcamentos antes de realizalos.

En outubro de 2011, o Sr Fervenza volvía anunciar: “Moaña, abrirá un parking de 20.000 m² no Rosal. OAlcalde xestionou o uso cos propietarios e a cambio o Concello encargase de xestionalo e mantelo”

O BNG, ven de preguntarlle tanto en Comisión, como nos Plenos de febreiro e de abril ao Sr. Fervenza sobre as xestións realizadas e os compromisos para levar a cabo esta actuación, decatándonos de que é unha nova “fervenzada”: non hai nada, de nada!

Non nos convenceu a explicación surrealista que nos transmitiu: que o propietario era de Madrid e custaba moito falar con el. E o que é peor, non consta en secretaría municipal ningún documento que acredite unha proposta entre o Concello e os particulares para conseguir terreo para a construción dun aparcamento público.

A día de hoxe a realidade é que novamente mentiu, anunciando unha obra e uns compromisos que non existen. Fala de algo que non é verdade. Anunciou unhas xestións e un compromiso de algo que non ten concretado. Falaba, con total descaro da creación de 300 aparcamentos na zona do Rosal, pero a verdade é que nos dez meses que leva no goberno non creou nin unha sola praza pública de aparcamento.

Fervenza engana ao veciños e veciñas, míntelle a Corporación e presenta unha nula xestión.

Cremos que o pobo de Moaña comeza a sentir vergonza de ter un alcalde mentirán, baralleiro e botafumeiro. Un alcalde accidental que sustenta a súa incapacidade de xestión na promesa continua, que ao pouco, acaba esborrallándose e quedando na máis absoluta ridiculez.