A alternativa que te defende

Author Archive

Foi en Moaña, no derradeiro día de Abril. A Comisión Comarcal das Mulleres do BNG, con Modesta Rioboo ao frente, organizou un acto de homenaxe á escritora inaugural da literatura galega que titularon “125 camelias para Rosalía de Castro”, no ano en que se cumpren 125 do seu falecemento. Chama a atención que a cultura “oficial” (se é que cabe chamar a algo así) ou, ao menos, a que pagamos todas e todos, omite calquer celebración ou recordación que permita sentar o seguinte: somos un povo; temos historia colectiva; ela, esta historia, é específica e non apendicular do planeta español; conta con elementos de forte significación material e simbólica, marcantes de modernidade, moito máis avanzados dos que á forza se nos impuxeron como mestres de progreso e de innovación. Afortunadamente, contamos cunha “outra” cultura, como evidencia este acto de Moaña que estou a gabar. Foi espléndido por varias razóns. En primeiro lugar, por non se limitar a unha conmemoración ritual ou “burocrática”, senón por implicar actores moi diversos. En segundo lugar, por concitar e manter a atención do público que ateigou o Centro Sociocultural “Daniel Castelao” durante dúas horas longas. En fin, porque demostrou con feitos que todas as artes son amigas, como querían os clásicos, e, destarte, houbo música, poesía, discurso, arte floral, imaxes…

Laura Almuíña compuxo magníficos centros de camelias que decoraron o escenario e eran mostra vizosa das duascentas variedades desta fror que cultiva na súa plantación. Xavier Blanco descobriunos a maxia dunhas músicas executadas con instrumentos ancestrais, tan vellos como os traballos a eles vinculados, no campo e no mar; por certo, fusión perfeita para unha poesía como a de Rosalía que eleva o popular á categoría de arte superior e merecente dunha épica dignificada. O grupo Donairare agasallounos con pezas tradicionais da mellor factura. Antía e Sara Pérez Davila, intérpretes de violino, executaron perfeitamente temas coñecidos da tradición musical galega, varios deles baseados en poemas rosalianos. Poemas da autora foron recitados nas voces de Antía Cal; Asunción Sóñora; Xosé Mª Álvarez Cáccamo; Asunción Estévez; Héitor Mera; Ana Blanco Cancelas; Rubén Aramburu; Rosa Estévez; X. Daniel Costas; Cristina González Piñeiro; Iria Aboi; Asunción Veloso; Marica Campo; unha servidora. Fago citación completa para que se comprobe a variedade de dedicacións, idades e profisións. Rendo homenaxe aquí á forza e entusiasmo de Antía Cal, con 87 lúcidos anos, a nos animar a todas e a todos a proseguir neste camiño de coñecemento e de autoestima colectiva, camiño que ela iniciara xunto a seu home, Antón Beiras, grazas a quen tivo a obra completa da escritora. En tal atmosfera, figúrense a honra que para min supuxo falar a todos os presentes da potencia e transcendencia da obra rosaliana, mesmo que, por mor da necesaria síntese, fose a golpe de “pinturas” de groso trazo…

Parabéns ás organizadoras, benia a todos os asistentes!

A atención hospitalaria para os máis de 600.000 habitantes que viven na Área Sanitaria de Vigo comezou a ser deficitaria nos anos 80 cando, coa inauguración do Hospital do Meixoeiro, constatouse que este xa era insuficiente para atender a toda a poboación que non podía ser atendida no Hospital Xeral.

Dende entón os partidos políticos, sindicatos, asociacións veciñais e colectivos integrados na Plataforma para a Defensa da Sanidade Pública iniciamos a demanda dun Novo Gran Hospital para a Área Sanitaria de Vigo, que rematase coa dispersión da atención en catro centros (un deles privado) con recursos insuficientes e que non daban resposta ás necesidades da poboación dunha das zonas máis puxantes tanto social como economicamente de toda Galiza.

Despois de moitos avatares o anterior goberno da Xunta de Galiza deu os pasos necesarios para dar satisfacción a esa demanda de toda a cidadanía e asumiu a construcción do Novo Hospital, realizándose o proxecto arquitectónico e consensuando con todos os colectivos e profesionais un plan funcional para a posta en marcha do Novo Gran Hospital.

Esta nova infraestructura sanitaria ía contar con 1.465 camas, o que permitía atender a toda a poboación da área, incorporaba recursos de alta tecnoloxía sanitaria como centro investigador e ía a ser centro de referencia para patoloxías como o cancro. Este hospital evidentemente era público e os cartos para o seu financiamento estaban na Sociedade Publica de Investimentos (SPI).

Fálase de financiamento e xestións privadas, de reducción de camas, de modelo multihospital, de varias portas de urxencias, de manter concerto singular con POVISA, pero en ningún momento se fala de Hospital de referencia, con altas prestacións, onde sexa atendida toda a poboación da Área Sanitaria de Vigo.

A fórmula de financiamento privado supón unha hipoteca que vai lastrar a capacidade de novos investimentos nos vindeiros anos e por en mans do capital privado a nosa saúde.

Desde O Morrazo, como unha das zonas afectadas por esta situación, máis aínda cando o noso hospital de referencia é privado, instamos á Xunta de Galiza que a financiación do novo Hospital de Vigo sexa totalmente pública. Ademais, o número de camas debe manterse no previsto polo anterior goberno, para atender a toda a poboación da Área Sanitaria de Vigo.

Este novo Hospital debe estar dotado de todos os servizos, mantendo o seu caracter estratéxico e a dotación prevista para a unidade de investigación. Ademais, debe configurarse como hospital oncolóxico de referencia para todo o sur de Galiza.

Deste xeito, queremos manifestar o noso apoio a todas as accións que está a desenvolver a plataforma para a defensa da sanidade pública e fai un chamado especial a participación na manifestación do 25 de marzo, as 20,00 horas dende o cruce da Vía do Norte, en Vigo.

Moaña, 22 de marzo de 2010.

BNG MOAÑA

A loita pola mellora sanitaria en Moaña tomou pulo ala polo 1999 da man do BNG. Unha loita con obxectivos concretos: unha piscina municipal, un centro de saúde e, con carácter inmediato, dotar a Casa do Mar duns servizos mínimos en tanto aquel non sexa realidade.

A piscina municipal, os terreos para o centro de saúde, a ambulancia medicalizada, o ascensor  ou a supresión de barreiras arquitectónicas na Casa do Mar e, nos últimos tempos,  a dotación dun servizo de fisioterapia e odontoloxía cos seus orzamentos, asignación de persoal e posta a disposición do Sergas do local esixido  para empezar a funcionar xa. Todo este resultado é froito dun traballo constante e cheo de complicacións e dificultades.

O 4 de abril do 2009, no pleno extraordinario sobre sanidade houbo un acordo unánime de todos os grupos políticos, PP e PSOE,  con dous compromisos concretos :

- O Concello porá a disposición do Sergas un local para fisioterapia e odontoloxía.

- O Concello xestionará o uso sanitario dos locais da Casa do Mar.

Como dicíamos, dende aquela o Concello púxose a traballar na procura destes dous obxectivos.  Froito dese traballo empezouse a tramitar un proceso que deu como froito a consecución dos locais para fisioterapia e odontoloxía na rúa Don Donato.

A falla de poucos meses para a posta en marcha destes locais un novo anuncio semella retrasar todo de novo. O responsable do Sergas acaba de “suxerir” ao Concello de Moaña que deixe sen efecto a sinatura do contrato de alugamento dos locais da rúa Don Donato que ían acoller as consultas de Fisioterapia e Odontoloxía. As xestións do PP ante a Consellería abren “unha nova alternativa” cuxos trámites se poñen en marcha: a prestación destes servizos na Casa do Mar.

De principio, nada teríamos que obxectar: aforro de alugamentos, concentración de servizos, pero…

Porque esperaron tanto? Porque non empezaron os trámites fai un ano? Danse conta que isto pode supor, na práctica un retraso de mais dun ano para a posta en marcha destes dous novos servizos? Por aforrar cartos ó Concello de Moaña? Non. O Sr. Fervenza o que persegue é unha foto máis pensando no 2011, por puro oportunismo, contando con apuntarse un tanto fora de tempo, nun partido xa xogado duramente por outros e pondo en perigo un servizo tan necesario e demandado que pode estar funcionando en cuestión de poucos  meses.

Por tanto pregámoslle o Sr. Fervenza que, se quere facer un favor os moañeses e moañesas, cumpra cos acordos aos que se comprometeu fai un ano, co seu partido xa na Xunta; acordos, respaldados pola Plataforma da Sanidade, que entendía que o déficit asistencial abrangue tamén a cirurxía menor, as citoloxías, a matrona, ao pediatra, a instalación de aparatos de banda ancha sen instalar por falla de espazo, e que estes servizos poderían prestarse nas zoas INFRAUTILIZADAS da Casa do Mar, sen esquecer os fins de carácter social non sanitarios para os que foi creada esta instalación e que  tamén teñen un importante número de  usuarios.

O PSOE  de Victor Pastoriza  sufre o síndrome dos partidos que despois de ter nas súas mans a posibilidade de resolver estes problemas  durante  catro anos, e non o fixeron, agora non son que de ser valentes e apostar ó máximo para Moaña: dispoñer xa de todos os servizos sanitarios que nos merecemos onda sexa, ata que o Centro de saúde  poida ser unha realidade. Prefiren  xogar a nadar e gardar a roupa. Coma sempre.

OS DOUS PUNTOS do acordo plenario son  perfectamente compatibles entre si, e así se votaron, e non vale vir agora coa substitución dun por outro, non nos dean un polo prezo de dous. E non esquezan que o salón de actos e a biblioteca tamén son necesarios.

Por unha vez, sumen; non resten por puro interese electoral.

 

boletin 5

 

 

 

 

 

 

 

 

Novo boletín do BNG en Moaña. dende hoxe nas casa de todos os Moañeses.

O BNG, ven de presentar unha pregunta no parlamento galego, co fin de solucionar a problemática suscitada polos usuarios de transporte de ría. Os nosos parlamentarios fieron constar a queixa reiterada da Federación de Veciños de Moaña A Chamusca , que consideran unha falta de respecto para os usuarios/as manter pechada a estación marítima de Moaña, unha intraestructura en boas condicións, mentres hai usuarios/as que teñen que estar á chuva mentres esperan o barco.

Adxuntamos o documento: pregunta parlamentaria estación marítima moaña.pdf